Металург ќе се обиде да избегне лош крај на 2014 пред своите гледачи

На Металург ќе му биде тешко в недела во 19 часот да ја заврши победнички 2014 години во последниот натпревар пред своите гледачи, против Веспрем. По болниот пораз од градскиот ривал Вардар, македонскиот шампион нема што повеќе да понуди против уште посилниот противник кој доаѓа. Веспрем веќе го совлада Металург со 33-21 во нивниот прв меч оваа сезона во СЕХА, така што тренерот Лино Червар вели дека нема многу начини и оваа средба да се направи поинаква. Сѐ уште имаат проблеми со повредите, па она штo останува е нивната желба, мотивација и бескомпромисна борба на теренот.

Металург има 11 бода на 6. Место на табелата, а Веспрем сѐ уште не направил грешка победувајќи 10 од 10. По убедливиот триумф против Татран, нема да сакаат да ја уништат перфекнтата серија ниту во Скопје.

Лино Червар, тренер на Металург:

Веспрем ни доаѓа во незгоден час, но сите гледаме да го одработиме овој меч и момците заслужено да се одморат и да се посветат на репрезентацијата. Дај боже сите да останат здрави, макар што веќе имаме повреди, Нелоски е надвор, Јоновски е повреден, Мојсовски се мачи со скршениот нос, јас се обидов да го поштедам малку во второ полувреме со Вардар. Немаме многу избор, повторно ќе ги вклучиме помладите и колку можеме ќе се спротивставиме. Тука се и постарите кои се жртвуваат, но сепак немаме ширина. Веќе игравме со нив и ја видовме целата нивна сила. Досега речиси сите противници ги добија глатко. Тоа е една силна одбранбена екипа, имаат многу странци, ракометари на секоја позиција и за сите елементи, специјализирани дефанзивици, имаат ирачи кои трчаат контра, одлични напаѓачи, така што потполнети се на сите места. Ние нашите недостатоци ќе ги надополниме со борбеност и ќе се обидеме да одиграме колку што можеме и сега и против Раднички во Крагуевац.

Филип Талески, играч на Металург:

Веспрем е една од најсилните екипи во Европа со една од најцврстата одбрани. Ние имаме проблеми со повредени играчи, но в недела ќе се обидеме да собереме сили и да се спротивставиме колку што можеме, со помош на публиката како наш осми играч да се израдуваме на уште една победа.

Карлос Ортега, тренер на Веспрем:

Металуерг релативно нова екипа по нивниот проблематичен период, откако загубија неколку играчи, меѓутоа тие секогаш се опасни на домашен терен и сѐ уште имаат добри ракометари. Затоа многу ги почитуваме. Знаеме дека играњето во Скопје никогаш не е лесно, но ќе се обидеме да ги освоиме трите поени. Нашата екипа полека се уморува. Првиот дел од сезоната беше долг со многу натпревари и тренинзи, но сакаме и во овие два последни меча да оствариме победи и потоа сите мирно да одмораме.

Мате Лекаи, играч на Веспрем:

И покрај тоа што знаеме дека Металург имаше проблеми неодамна, очекуваме тежок натпревар викендов. Многу навивачи ќе дојдат да го следат мечот, а екипите од Скопје секогаш се опасни кога ја имаат поддршката од гледачите на домашен терен. Нашиот тим е малку уморен на крајот од оваа година, но не би сакале да загубиме поени во преостанатите натпревари, така што сакаме победа во недела. За мене лично, драго ми е што по повредата можев целосно да му помогнам на мојот тим во последниве мечеви.