Македонското дерби во СЕХА-лигата секогаш привлекува големо внимание, а сигурно така ќе биде и утревечер од 20:15 часот во арената "Борис Трајковски" и покрај проблемите кои ги имаат двете екипи, по исцрпувачката сезона во Лигата на шампионите.

Вардар ги загуби Блаженко Лацковиќ и Игор Караичќ поради повреди, а во Металург Аце Јоновски и Марко Нелоски ќе го прескокнат овој меч, додека Ренато Вугринец сѐ уште е несигурен. Вардар веќе победи во првото дерби во Скопје, со 27-21 во 1. коло, а после тоа имаше пристојна сезона во СЕХА-лигата, држејќи ја удобно третата позиција на табелата по девет одиграни меча со 21 поен. Металург пропушти и одложи неколку натпревари, така што се наоѓа на шестото место со 11 бода, но од седум одиграни меча. Додека Вардар има светла иднина во ЛШ оваа сезона, Металург ги загуби шансите за пласман во нокаут-фазаата, така што СЕХА ќе му биде приоритет, барем некое време, додека да почнат обврските во домашното првенство.

Лино Червар, тренер на Металург:

Утре играме со Вардар, в недела против Веспрем, потоа одиме во Крагуевац. Можам да кажам дека овие натпревари не ни доаѓаат баш добро по напорите во ЛШ и со оглед на ситуацијата која ја имаме во клубот веќе некое време. Имаме и проблеми со повреди. Нема да игра Јоновски, Марко Нелоски исто така се повреди, а Вугринец утрово исто така не тренираше, но ќе видиме за него на вечерашниот тренинг. Ова некогаш беше најголемото дерби на Балканот, а сега работите се сменија. Вардар е во добра положба со шанси добар резултат во ЛШ и му посакувам сѐ најдобро затоа што го почитувам. Знам дека и тие имаат повредени играчи, Лацковиќ не игра, слушам дека и Карачиќ паузира, но и ние имаме проблеми и ќе видиме со кој состав ќе го одиграме овој меч.

Гоце Георгиевски, играч на Металург:

Од името на играчите можам да ветам една максимално борбена и дисциплинирана игра. Сите знаеме што значат натпреварите со Вардар, па макар биле и пријателски. Секогаш има борба, притисок, жар и знам дека нѐ очекува тежок меч. Вардар е во подобра ситуација од нас, можам да кажам дека се фаворити. Ние сме малку редуцирани со составот, знаете каков натпревар имавме во саботата со Брест, малку погруб од обично, но ќе се бориме максимално.

Раул Гонзалес, тренер на Вардар:

Натпреварот е важен за нас за да продолжиме со победничката серија. Ова е македонско дерби, во кое секогаш гледаме врвен и неизвесен ракомет. Металург е секогаш силен противник за вардар. Ослабени се со заминувањето на неколку ракометари, но мислам дека во ваквите дуели е пресудна желбата за позитивен резултат.

Немања Прибак, играч на Вардар:

Овој натпревар доаѓа во сенка на дуелите од лигата на шампионите, но тоа не значи дека нема да биде интересен. Напротив, македонското дерби секогаш е највозбудливиот натпревар тука. Ние како и на секој друг меч ќе одиме на победа и утре, па се надевам дека ќе им овозможиме на навивачите нови моменти за славење. Мислам дека иако е ослабен, Металург е квалитетна екипа, а тоа го докажа во натпреварите од Лигата на шампионите. Таму повеќе немаат шанса, па сигурно ќе се ангажираат повеќе за СЕХА-лигата. Очекувам уште еден неизвесен натпревар.