По успешните мисии во нивните последни настапи во ЕХФ лигата на шампионите, Вардар и Металург повторно ќе играат меѓусебе во уште едно градско и македонско дерби. Вардар ќе го нагости Металург во вторник (17,45 ч.) во СЦ "Јане Сандански" во нивниот 11-ти меч во СЕХА Газпром лигата.

Двата тима имаа одличен викенд во ЕХФ лигата на шампионите, со победи во гости. Вардар во Германија го победи Рајн Некар во Б групата, а Металург славеше во Норвешка кај Елверум. Тоа бе добра мотивација за играчите на двете екипи пред нивниот втор дуел сезонава. На почетокот на септември, Вардар победи во гости 25-24.

Традицијата во СЕХА Газпром лигата е на страната на Вардар. Домашниот тим на 10 натпревари досега има шест победи, а двапати Металург ги освојувал бодовите на средбата. Ако се погледне табелата тогаш Вардар е апсолутен фаворит, но нивните натпревари секогаш биле полни со драма.

Последен пат Металург победил во СЕХА лигата против Вардар во декмеври 2013 година. На последните три натпревари Вардар излегувал како победник.

На утрешниот натпревар во СЦ "Јане Сандански", во домашниот состав ќе ги нема Илија Абутовиќ и Игор Карачиќ поради повреди. И Металург има проблеми со повредите, па ќе ги нема Младеновиќ, Марчец и Драгаш. Неизвесен е и Брајовиќ, кој не настапи ниту на последниот меч во Норвешка.

Лино Червар, тренер на Металург:

Натпреварот со Вардар доаѓа во незгоден момент за нас, бидејќи пред само еден ден имавме тешка гостинска средба со екипата на Елверум, па моите ракометари во голема мера се уморни. Сепак, овој дуел има големо минато и секогаш е интересен за љубителите на ракометот во Македонија. Вардар е апсолутен фаворит, а на моите млади ракометари е да се претстават во најдобро можно светло.

Филип Кузмановски, играч на Металург:

Не очекува тежок натпревар, но ние ќе се обидеме да му се спротивставиме на фаворитот на оваа средба. Јасно е дека ќе ги вложиме сите свои сили, па ќе видиме дали тоа ќе биде доволно за добар резултат.

Раул Гонзалез, тренер на Вардар:

Играме македонско дерби против традиционалниот ривал Металург. Ќе биде интересен натпревар и сакаме да покажеме најдобро што знаеме пред домашните навивачи. Некои играчи се повредени вклучувајќи го Карачиќ и Абутовиќ. Како и да е, Вардар е на првото место и сакаме да победиме за да останеме на врвот во СЕХА Газпром лигата.

Стојанче Стоилов, играч на Вардар:

Ни претстои натпревар против Металург, што секогаш е специјален за двата тима. Емоциите секогаш се присутни, и на повисоко во во однос на другите мечеви. Ги респектираме како сериозен ривал, но ние сме на победничка патека, по оној кикс во Загреб. Без разлика на ривалитетот, знаеме дека Вардар е фаворит и мораме да го покажеме тоа на терен.