Изгледа играчите на Металург конечно се во добра натпреварувачка форма и сакаат од тоа и да профитираат, и да ја продолжат победничката низа, иако нивен следен ривал во СЕХА Газпром лигата е традиционално незгодниот тим на Нексе од Нашице. Натпреварот е закажан за во вторник (17,45 СЦ "Јане Сандански")

По трите тесни порази во уводните натпревари во СЕХА ГАзпром лигата сезонава, Металург успеа да направи две победи по ред, една во СЕХА лигата против Татран, и пред неколку денови во ЕХФ лигата на шампионите против Елверум. Но, и Нексе ја оствари првата победа на претходниот натпревар против Извиѓач и хрватскиот вице-првак се надева на добрата традиција. 

Нексе е еден од неколкуте клубови што досега учествувале во сите досегашни сезони во СЕХА лигата, и традиционално секогаш игра добро во Скопје. На нивните меѓусебни дуели со Металург во СЕХА лигата, Нексе се радувал четрипати, а трипати хрватскиот тим си заминал од Скопје со бодови.

Лино Червар, тренер на Металург:
По тешкиот меч во ЕХФ лигата на шампионите, сега имаме тежок распоред пред нас. Следи период во кој повеќе ќе бидеме на пат отколку на тренинг. Нексе освен што е млада екипа, овој тим има и искусни ракометари кои што можат да бидат многу проблематични за противникот. Нивната контра и бековска линија ќе ни бидат најголем проблем. Ќе се обидеме да се одмориме по тешкиот викенд што е зад нас.

Марко Неловски, играч на Металург:
Нексе ни е познат противник. Игравме со оваа екипа во подготвителниот период. Тоа е една млада екипа, но несмееме да ја потцениме и мора максимално да се подготвиме за овој натпревар. Ако одиграме на нашиот максимум, резултатот ќе си дојде сам по себе.

Зденко Корди, тренер на Нексе:
Игравме со Металург на турнирот во Кањижа летово. Но, мораме да го заборавиме тој меч. Во меѓувреме во Металург дојдоа три одлични ракометари и клучни играчи. Ја почнаа сезоната добро, со три одлични натпревари и одличен отпро на трите топ тима во лигата. Победија против Татран, а пре днеколку денови ја почнаа и ЕХФ лигата на шампионите со победа. Имаме некои желби и цели во Скопје што сакаме да ги оствариме.

Томислав Нуиќ, играч на Нексе:
Металург е одличен тим предводен од Лино Червар. Ние секогаш се чувствуваме добро во Скопје и секогаш играме добро. За добар резултат мораме да играме подобро во однос на она што го игравме против Извиѓач кога лесно победивме. Ова апобеда беше за наша самодоверба.